تكررت عقب البطا والتقينا
من عقب ما مرن سنينن طويلات
في صدفةن فيها حشا ما درينا
ولا هقينا نلتقي عقب ما فات
لا شك جابتها الليالي وجينا
رغم الفراق ورغم ذيك المسافات
في موقفن بان التوتر علينا
لحظه تلين ابها القلوب القويات
قالت شلونك قلت ربك عوينا
الحمد لله عاضني عقب لوعات
الله رزقني في هنوفن تبينا
احيت خفوقن كان باعداد الاموات
هي نور عيني فرحتي والضنينا
القابها عن ضيقة الصدر سجات
قالت سليت وقلت عقبك سلينا
لكن عقب ما لاعنا الحب مرات
قالت شلون وقلت لا تسالينا
مافات فات ولا تفيد الحسوفات
قالت تكلم قلت مهما حكينا
الدمع ما ينفع عزيز ليا مات
قالت نسيت وقلت لا ما نسينا
لكن قنعنا والقناعه من الذات
قالت اروح وقلت وش في يدينا
روحي عسى في كل خطوه سلامات
بصبر على فرقاك مهما حيينا
ولا تشوه صادق الحب زلات
قالت على ماكنت دنيا ودينا
تكرم وتكرم عن دروبن رديات
قلت اسمحيلي قبل لا ترحلينا
يم الديار اللي علينا بعيدات
تراي ذخرن لاحدتك السنينا
اجيك مهما واجهتني صعوبات
من اليوم اخوك وغيرها ما بغينا
كلي فداك ان صار بالوقت ميلات
وتبسمت باعجاب مدري حنينا
وتهشمت قدام عيني بعبرات
قالت فمان الله قلت انتهينا
واقفت تكلم نفسها بس بسكات
وقفت تقدير لها ثم مشينا
درب مشوه اهل القلوب العفيفات
امشي واردد ليتنا مالتقينا
وش جابها عقب السنين الطويلات
وسلامتكم
موضوع: امشي وردد ليتنا ما التقينا لشاعر سعود الهاجري 