شفت سمرا كل مافيها لعوب
شفت سمرا تنتحل لون الغروب
قدّها زين ٍ طروب
خليٍ منها العيوب
كل مافيها يخلينى أذوب
عطرها
فستانها
مشية الغزلان فى أفنانها
جيدها الفضى
ولمعة خد من لون الغروب
طرفها والسحر فى أجفانها
لو ترف بعينها تسبى القلوب
إن حكت ! تسكت طيور الكون تسمع لحنها
وتوقف الدنيا لو ابتسمت عذوب
وإن غدا النسناس داعب شعرها
شف جدايلها
سحاب وبرد
وامطار ورعود
نورها يطغى على الشمس ويزود
ايةٍ لله أبدع خلقها
مارأت فى الأرض عينى مثلها
وشفتها والله انى شفتها
وقلت ياذا النور يالظبي الشرود
تخاوينى؟
أبسمع ردّها!
بس ماحكت
وطالعت فينى
هزمنى سحرها
قلت تتدلل
ورحت أوصف لها
يالعيون الخضر
يالخصر النحيل
وياجميل
وياسليل
وياكحيل
و.....
طالعتنى
وقاطعتنى
ماحكت بس قاطعتنى
عينها بعينى
ومارتعشت إيدينى
وهالبريق بعينها ماهو دليل
ماهى نظرة حب أو حتى اعتراض
ماهى دلال وغنج أو إسفاف مافيها انتفاض
؟
؟
؟
هذى لمعة حزن تسكن عينها
قطعت قلبى
وفجأه
رحت أقارن
هوحسنها فى حزنها
أو حزنها فى حسنها
وليش هالمغبون يسكن صدرها
وكيف أصلاً جا ووقف حدّها
ومين هالمخبول ياللى صدّها
وبغمرة التفكير جانى ردّها
تقرأ افكارى وشرودى
ولا حظت
واتبسمت
ومانا الوحيد اللى سمعها وشافها
كان كل الكون يسمع همسها......
تكلمنى؟
قلت إيه ماغيرك عنود
اتنهدت
فالت:
أنا والحب مانعرف صلاح
إن طوانى بليل يهجرنى الصباح
يتركنى مكسورة جناح
يسرقنى فى لحظه
ويسقينى المراره والنياح
يرسم على قلبى صور
خوف وعذاب وموت
وأحزان وجراح
تقدر تقلّلى
ليه احب
وكيف احب
ومن ينسينى الّلى راح
لاتحاول
ماهقيت انى أعيشه من جديد
صادنى مرّه
وعشته بين أقفاص وحديد
يوم أنطّ الحبل
ويوم أمشى فيه
ويوم أجمع له كرات الجولف ويرمينى بعيد
لوّنت وجهى وانقطع نفسى
ولبست أثواب العبيد
وسمعت كل الناس
تمدحنى وتوصفنى
ولكــــــــــــــــــــــــن
كلهم يمشو وأنا أبقى وحيده
أنتظر وحدى
وأفرش فى ليالى البرد نجماتى
وأجمع ذكرياتى
وأحزانى السعيده
ولا تحاول
(حــــــــــــــب)
ما أبغاه
لو ينزل من الجنّه ويكتبنى قصيده....
موضوع: سمراء الجنه 